Trinta persoas fixeron medrar onte o número de entradas sobre o sector audiovisual galego na wikimaratón organizada pola Galipedia e a Academia Galega do Audiovisual na Facultade de Ciencias Sociais e da Comunicación da Universidade de Vigo, en Pontevedra. No inicio da xornada os responsables da enciclopedia galega en rede, Elisardo Juncal e Adrián Estévez explicaron cal era a filosofía para ser editor na Galipedia e tamén os procedementos para facelo. Tralos primeiros pasos, comezou o traballo práctico, actualizando algunhas entradas e iniciando outras novas de nomes relacionados co sector audiovisual en Galicia.