O Consello de Ministros deu hoxe luz verde, de xeito definitivo, ao Real Decreto que regula a relación laboral das persoas artistas e do persoal técnico e auxiliar do sector das artes escénicas, audiovisuais e musicais.
Este texto substitúe o RD 1435/1985 do 1 de agosto, polo que se regula a relación laboral especial dos artistas en espectáculos públicos que pasou a denominarse Real Decreto polo que se regula a relación laboral especial das persoas artistas que desenvolven a súa actividade nas artes escénicas, audiovisuais e musicais, así como das persoas que realizan actividades técnicas ou auxiliares necesarias para o desenvolvemento da devandita actividade pola modificación introducida polo RD 5/2022.
Desde os sindicatos CCOO, UXT, UAA e CONARTE aplaudimos a entrada en vigor desta norma, que despois de 40 anos, permitirá adecuar o actual marco laboral á realidade de estudios, salas de concerto e teatros.
O Consello de Ministros, da man do Ministerio de Traballo, deu un paso crave para quen saca adiante o sector artístico neste país.
Esta norma recoñece dereitos que os sindicatos levamos negociando e pelexando nos convenios colectivos desde hai anos e que, a través do coñecido como ‘Estatuto do Artista’, pasan a ser de aplicación para todas as persoas traballadoras do sector.
Entre outras, as medidas aprobadas garanten:
1. Unha regulación do traballo de menores, igual para todo o país, onde prima o interese do menor sobre calquera outro interese.
2. O recoñecemento de que para realizar unha obra artística é necesario un traballo previo, de posproducción e de promoción, por parte do equipo artístico. E, sobre todo, que ese traballo debe ser remunerado.
3. Que o tempo de traballo debe estar planificado: con antelación e de xeito informado.
4. Que a intermitencia non só é temporalidade e que as xiras e desprazamentos son parte natural do traballo artístico.
5. Que nos parques temáticos e de atraccións tamén traballan artistas.
6. Que a igualdade de dereitos e a intermitencia poden ir da man.
7. Que cando o corpo e a intimidade vense afectados durante un traballo debe haber unha especial atención.
8. Que existirán protocolos anti acoso e plans de igualdade específicos e adaptados á realidade do sector.
9. Que todas as persoas traballadoras do sector teñen dereito a festivos e vacacións.
Este Real Decreto leva máis dun ano sendo negociado, co apoio constante das nosas afiliacións, co obxectivo de mellorar o sector e dar garantías ante un mercado cada vez máis esixente e internacionalizado.
Desde a parte social consideramos que o grao de éxito conseguido é altísimo, pero sentimos que, por unha cuestión formal, non poidamos celebrar tamén a existencia de límites para o uso da intelixencia artificial xenerativa. Esta tecnoloxía pon ao sector cultural ante un risco existencial, pero, sobre todo, sitúa ás persoas traballadoras nunha posición claramente vulnerable e por iso desde o sector defendemos a necesidade de límites claros. Perdemos unha oportunidade e isto deixa en mans da negociación individual calquera cuestión sobre os usos da intelixencia artificial xenerativa.
A pesar de iso, os sindicatos imos seguir traballando para conseguir límites a estas tecnoloxías coas ferramentas dispoñibles. A lei da selva non é unha opción e para evitala seguiremos defendendo modelos de protección claros e transparentes.