Un total de 45 espectáculos e preto de 400 profesionais inscríbense nos 30º Premios de Teatro María Casares

Un total de 45 espectáculos e preto de 400 profesionais concorren aos 30º Premios de Teatro María Casares, galardóns organizados pola Asociación de Actores e Actrices de Galicia (AAAG) dende a súa fundación en 1997 coa colaboración habitual de institucións e entidades como son a Xunta de Galicia, o Concello da Coruña, a Deputación da Coruña, a Fundación SGAE, a Fundación AISGE ou Gadis. O proceso de inscrición finalizou o pasado 8 de xaneiro rexistrando unha gran participación ao inscribírense un total de 45 montaxes e máis de 350 candidaturas de profesionais que se postulan para as dezaseis categorías nas que se dividen os premios: maquillaxe, vestiario, iluminación, espazo escénico, espazo sonoro, texto orixinal, adaptación-tradución, actor secundario, actriz secundaria, actor protagonista, actriz protagonista, dirección, dirección de movemento, espectáculo, espectáculo de monicreques e espectáculo infantil.

Tras a fase de inscrición, a AAAG iniciou xa a primeira rolda de votacións, aberta a un censo formado por máis de 450 profesionais do sector das artes escénicas. Ademais do corpo asociativo da AAAG, poderán votar responsables da xestión e programación cultural, xornalistas, críticos e as persoas finalistas en edicións anteriores. Das súas votacións, sairán os espectáculos e profesionais finalistas en cada unha das dezaseis categorías. O prazo de votacións estará aberto até o 24 de febreiro ás 12.00 h.

Os Premios de Teatro María Casares son o grande escaparate do teatro, así como a gran festa para toda a profesión teatral. Este ano, a entrega celebrarase o vindeiro 8 de abril no Teatro Rosalía Castro. Ese día entregarase ademais o Premio de Honra Marisa Soto, que se lle concede cada ano como homenaxe a unha persoa ou a unha entidade polo seu traballo a prol das artes escénicas, e lerase o Manifesto Galego no Día Mundial do Teatro.

RELACIÓN DE ESPECTÁCULOS INSCRITOS AOS XXX PREMIOS DE TEATRO MARÍA CASARES