A recoñecida xornalista Tereixa Navaza, foi encargada de defender a ILP en representación da comisión promotora. Navaza incidiu en que detrás desta ILP está “unha sociedade que reclama o seu dereito a unha información veraz”. Nese sentido, a xornalista denunciou que lonxe de cumprir os medios públicos a súa misión de informar sen inxerencias durante a vaga de lunes “unha vez máis a CSAG (antes CRTVG) abandonou ao pobo galego e traizoou a súa misión de servizo público”.
A ILP demanda que se garanta nos nosos medios o “respecto escrupuloso á obxectividade, a imparcialidade, a neutralidade, a veracidade e o pluralismo informativo, erradicando a manipulación e a cancelación de contidos e profesionais”. Mais tamén que se recupere a perspectiva da realidade social, laboral, económica e cultural do país e de todo o seu tecido social, nos contidos informativos, divulgativos, educativos e de entretemento, garantindo o dereito de acceso, seguindo criterios obxectivos de representación e implantación social, sen que poida excluírse ningún grupo social e co máximo respecto ao pluralismo e á participación democrática de toda a sociedade galega.
PSOE e BNG manifestaron o seu apoio á ILP mentres que o PP anunciou o seu voto en contra e abandonou en masa a cámara de representantes do pobo galego, na que non quedou nin un só membro do goberno e tan só 14 das súas deputadas e deputados.
Centos de persoas concentráronse no exterior do Pazo do Hórreo para reclamar “liberar os nosos medios públicos do secuestro no que os mantén, desde hai xa demasiados anos, o goberno da Xunta, en mans do Partido Popular”.