Volver

A TVG non retransmitirá a gala dos XXIII Premios de Teatro María Casares

>> A AAAG prescinde da colaboración da Televisión de Galicia pola negativa dos seus responsables a reunirse este ano coa AAAG, a mellorar as condicións da retransmisión e a emitir a gala pola primeira canle da TVG nun horario razoable

>> A gala poderase ver en streaming por youtube

A Televisión de Galicia non retransmitirá este ano a gala dos Premios de Teatro María Casares. A decisión tómaa a Asociación de Actores e Actrices de Galicia (AAAG) por diferentes motivos. En primeiro lugar, é unha decisión meditada en diferentes asembleas internas da Asociación, nas que se manifestou a necesidade de mellorar as condicións da emisión por parte da TVG ou, en caso contrario, de buscar novas alternativas. Con ese mandato asembleario, a AAAG solicitou ao longo dos últimos meses reunións cos responsables de Programas do ente para propoñerlles cambios e melloras na retransmisión. Non obstante, tal xuntanza nunca tivo lugar. En segundo lugar, envióuselle por escrito a petición de mellorar diferentes aspectos da retransmisión e solicitouse que a emisión fose pola primeira canle da TVG nun horario razoable. As peticións foron ignoradas e ofreceuse dende a TVG as mesmas condicións dos últimos anos nos que a gala dos María Casares ficaba reducida ao streaming na web e á emisión pola segunda canle en horarios poucos favorables para a audiencia.

A AAAG considera que a CRTVG falla neste senso e noutros moitos na súa obriga de difundir a cultura propia en xeral e a teatral en particular. Ademais, parece que nin os María Casares nin o sector escénico encaixan nas coordenadas marcadas polo lema de #Cultura365, impulsado pola CRTVG dende o momento en que se desvirtuou a marca histórica do Diario Cultural con gran protesta dentro do sector cultural. A decisión da AAAG chega nunha época de forte cuestionamento do labor público xeral do ente, tal e como evidencia a iniciativa dos Venres Negros, impulsada por parte do persoal da CRTVG, ou a convocatoria de folgas o pasado mes de decembro.

Por todo o exposto, a AAAG ofreceralle ao público a posibilidade de seguir a retransmisión dos María Casares través de Youtube a partir das 20.30 h. do xoves 21 de marzo.