Galicia Escena Pro, a feira profesional das artes escénicas organizada pola Agadic, celebrará entre o vindeiro luns 11 de xuño e o xoves 14 de xuño a súa edición de 2018. Ao longo dos catro días que dura o encontro, programadores/a, xestores/as culturais, profesionais do sector e público xeral poderán asistir ás representacións dun total de 17 espectáculos, quince deles producidos por compañías galegas e dous asinados por compañías madrileñas convidadas. Galicia Escena Pro repartirá a súa actividade polos escenarios da Fundación SGAE, do Salón Teatro, do Auditorio Abanca e do Teatro Principal. Ademais, un total de dez compañías presentarán os seus futuros proxectos na xa tradicional sesión de 'pithing', que terá lugar o xoves 14 na Fundación SGAE ás 12.30 h.
LUNS 11
A programación arrincará no Salón Teatro o luns ás 11.00 horas, momento en que a compañía de danza Entremáns ofrecerá a súa montaxe destinada ao público familiar Gaia. A peza, está dirixida e interpretada por Kirena C. Martínez e Estefanía Gómez. Ás 13.00 horas, Galicia Escena Pro levará a súa atención á Sala Germán Coppini da Fundación SGAE, onde Katarsis representará o seu espectáculo familiar Bathtime, dirixido por Carolina Ramos e Kevin Stewart. Este útlimo, xunto a Estíbaliz Veiga, subirá ás táboas para interpretar a peza.
Xa pola tarde, ás 17.30 h., Contraproducións representará no Auditorio Abanca Fillos do sol, obra escrita e dirixida por Cándido Pazó e coproducida polo FIOT Carballo. Na peza, interpretada por César Cambeiro, Alba Bermúdez e Adrián Ríos, realízase unha aproximación á figura de Eduardo Pondal e a súa obsesión coa obra que ocupou toda a súa vida como escritor: Os Eoas. O servidorde dous amos, a última proposta de Talía Teatro, representarase ás 19.30 horas no Teatro Principal de Santiago. A montaxe, dirixida por Diego Rey, conta cun elenco formado por Artur Trillo, María Ordóñez, Marta Lado, Marta Ríos, Xurxo Barcala, Toño Casais, Diego Rey e Dani Trillo, e actualiza o clásico homónimo de Goldoni. Para clausurar a primeira xornada, a feira regresará ao Salón Teatro e á danza contemporánea. Paula Quintas e Traspediante representan ante o público Plastic, proposta dirixida por Rut Balbís.
MARTES 12
A segunda xornada comezará ás 11.00 horas na Fundación SGAE. No escenario da súa Sala Germán Coppini, Tanxarina porá en escena A Galiña azul, adaptación realizada por Cándido Pazó da célebre novela de Carlos Casares. Xa ás 12.15 horas, na Sala 2 da Fundación SGAE, Borja Fernández presentará o seu Salvador, montaxe de teatro documento naque o intérprete pescuda nas súas orixes familiares para descubrir a figura do seu avó, quen na posguerra emigrou -coma tantos outros galegos e galegas- para non volver dar sinais á familia que deixaba atrás.
O Auditorio Abanca, ás 17.30 h.,recibirá a Mofa e Befa. Víctor Mosqueira, acompañado nesta ocasión por Josito Porto, desenvolverán sobre o escenario a filosofía deste histórico dúo cómico na obra Cranios privilexiados ou crítica da razón perralleira, obra dirixida por Carlos Santiago, quen escribiu xunto a Pepe Sendón o libreto. Dúas horas máis tarde, ás 19.30 horas, Sarabela Teatro presentará O rei morre, adaptación dirixida por Ana Vallés do texto dramático de Ionescu. Os intérpretes Fernando Dacosta, Fina Calleja, Nate Borraja, Sabela Gago e Alfonso Míguez conforman o elenco. Finalmente, o día péchase no Salón Teatro ás 22.00 horas con Procedimientos ante el vacío, obra da compañía Ensalle dirixida por Pedro Fresnada e protagonizada por Raquel Hernández, Diego Anido, David Santos, Nacho Muñoz e opropio Fresnada.
MÉRCORES 13
Planeta Ardora, de Trompicallo, porá en marcha a terceira xornada de Galicia Escena Pro. A obra representarase na Sala 2 da Fundación SGAE ás 11.00 horas. A seguinte montaxe da programación será Patapatúm, do Elefante Elegante. A compañía de Gonçalo Guerreiro e MaríaTorres presentará esta obra para o público familiar acabada de estrear no mes de abril de 2018. Trátase dunha peza de teatro xestual sen palabras que reflexiona sobre o tempo, a crianza e os subterfuxios cos que enchemos as nosas ausencias.
A tarde estará protagonizada por Elisa e Marcela, obra de A Panadaría que nos pasados María Casares acadou catro galardóns, incluído os de mellor espectáculo e dirección. A súa función terá lugar no Auditorio Abanca ás 17.30 horas. Ás 19.30, o Teatro Principal recibirá a primeira das dúas compañías madrileñas convidadas: La Estampida, que ofrecerá Lo nunca visto. A xornada pecharase co coreógrafo e investigador Javier Martín, cuxa obra performativa Método negro veraseás 22.00 horas no Salón Teatro.
XOVES 14
La Tartana é a segunda das compañías madrileñas convidadas e a encargada de abrir a derradeira xornada desta Galicia Escena Pro. Ás 11.00 horas, na Sala Germán Coppini, representará a peza infantil Soñando a Pinocho, na que como non podía ser doutro xeito se fusionan o teatro de actor e de monicreques. A danza volverá ás 17.30 horas ao Teatro Abanca con La soledad de Wally, produción de danza urbana constituída por catro pezas ('Water', 'Impermeable', 'Protocolo' e 'Pipas al aire'). A montaxe pertence á compañía Elahood, formada en 2017 por Sabela Domínguez Pérez e Julia Laport Rivas.
Pola súa banda, Emedous chegará ás 19.30 horas ao Teatro Principal para presentar a súa última proposta escénica: A leituga. Trátase dunha comedia dramática dirixida por Víctor Duplá a partir dun texto do venezolano César Sierra, cuxa trama pivota sobre a vida, a familia e os coidados. En escena reúnense Antonio Durán'Morris', Mercedes Catro, Federico Pérez, María Vázquez e Xosé Barato.
Por último, a compañía encargada de clausurar este ano Galicia Escena Pro será Ibuprofeno Teatro, compañía que finaliza a súa triloxía gastronómica con Casa O'Rei, un xogo escénico escrito e dirixido por Santiago Cortegoso que traslada o clásico shakespiriano d'O rei lear á unha típica casa de xantares galega. Miguel Borines, Marián Bañobre, Víctor Mosqueira, Victoria Teijeiro, Teté García e Xosé M. Esperante conforman o elenco.
PITCHING
O xoves será o día en que se celebre o pitching, sesión de presentación na que varias compañías presentan as súas vindeiras propostas escénicas. En total, son dez as formacións que participan este ano. Deste xeito, o Colectivo Verticalia (formado polas compañías Deulirum e Traspediente) presentarán Alma (non é hippie), Iria Pinheiro fará o propio co seu proxecto Anatomaía dunha Serea, que partirá da violencia obstetricia para chegar a temas como a maternidade, a familia, a economía; e PistaCatro adiantará as esencias de Arnoia Arnoia: o Circo da Casa pequena, montaxe dirixida por Quico Cadaval que adapta o texto de Méndez Ferrín.
Fantoches Baj presentará Auga que non vas beber, obra gañadora do Barriga Verde para textos de teatro de títeres na modalidade de adultos en 2009; Señora Supina adiantará as claves de Cinco mulleres que comen tortilla e a compañía de Mikel Arístegui presentará In Between. Teatro del Andamio falará de Insubmisión, Alfredo Muíño de Involución e Inversa Teatro realizará un novo achegamento á filosofía para abordar a violencia machista. Por último, Tamara Canosa, Lucía Aldao e María Vázquez falarán do seu proxecto Marelas.