“Taller de linguaxe inclusiva” con Llerena Perozo. 25 e 28 de xuño en Santiago

Etiquetas:

Dirixido a profesionais da interpretación e da escena, neste taller traballarase especificamente arredor das características concretas da profesión en relación á comunicación pública, tanto para mellorar a eficacia da mesma como para acadar o maior nivel de inclusividade posible. Contamos co inestimable patrocinio da Fundación AISGE para a realización deste obradoiro.

Metodoloxía

Este obradoiro fundaméntase na aprendizaxe dunhas persoas das outras, na experiencia práctica, con dinámicas de grupo e exercicios que son simulacións, e no que a meirande parte da teoría vaise extraendo da práctica. Todo está pensado e se executa dende a perspectiva de xénero aplicada á comunicación pública.

Contidos

- A linguaxe como representación da realidade.

- A linguaxe como creadora de realidades.

-As mulleres e os homes no discurso público, na historia e na actualidade.

-A teoría da comunicación, a importancia do contexto, e a teoría da intelixencia creadora.

-Características do discurso oral.

-Como elaborar un discurso oral eficaz e inclusivo para comunicarnos, e que nos represente.

-Características da comunicación corporativa.

-Como traballar cunha comunicación corporativa inclusiva.

-Modelos de comunicación patriarcais e non patriarcais.

-A empatía e a asertividade. Non só as palabras comunican.

-Técnicas de improvisación na comunicación pública.

-Técnicas e trucos para facer das nosas linguas medios inclusivos.

Hai que ter en conta que esta é unha actividade moi participativa, na que as necesidades do propio alumnado van dictando o guión final.

A docente

Llerena Perozo Vigo, 1974.Feminista. Especializada en comunicación e a súa relación con xénero, cultura e medio ambiente. Traballa en Versátil Servizos Editoriais e o seu selo Auga Editora. Dende 2001 imparte o curso de comunicación oral para mulleres, e dende 2012 faino, alén doutros encargos (Concello de Vigo, Concello de Ourense, diversas asociacións e colectivos, sindicatos, etc.), de xeito regular e en convocatorias abertas na Libraría de Mulleres Lila de Lilith. Ademais imparte conferencias sobre comunicación e xénero a demanda, e obradoiros relacionados con esta temática ou con especificidades da mesma.

Datas e duración

Dúas sesións de 4 horas o 25 e 28 de xuño, en horario de 16h a 20h. 8 horas

Lugar:

Sede da Fundación SGAE en Santiago de Compostela. Rúa das Salvadas 2A. http://goo.gl/maps/LO3pb

Prazas e selección do alumnado:

Este obradoiro ten 15 prazas. A admisión no obradoiro farase por orde de inscrición.

Prezo

Socixs AAAG e /ou AISGE: 15 euros

Non socixs: 30 euros

Inscrición

Desde o 14 de xuño ás 12 horas ata o 20 de xuño ás 15h. a través do formulario ao que se accede a través do botón "inscribirme" na parte superior desta páxina (só dispoñible a partir da hora sinalada)

Se es socix da AAAG, só tes que iniciar a túa sesión na páxina e premer “inscribirme” no formulario. O obradoiro aparecerá no apartado “inscricións” do teu espazo privado.

Reserva de praza e pagamento

Comunicarase a listaxe de admisión o 21 de xuño. De haber máis solicitudes que prazas constituirase unha lista de espera.

Na mesma comunicación de admisión indicarase a forma e datas de pagamento. No caso de que algunha das persoas admitidas non o efectúe nas datas indicadas, a súa praza será adxudicada á seguinte persoa na lista.

De non acadar solicitudes suficientes, a organización poderá suspender a realización do obradoiro.